O Poder Xudicial carga contra Pablo Iglesias por sinalar nunha entrevista que a Xustiza española foi "humillada" por tribunais europeos en diversas resolucións polo procés catalán. Escasas horas despois, Moncloa saíu na defensa do vicepresidente segundo, subliñando que as súas palabras se encadran na liberdade de expresión.
O BNG lanza a súa precampaña para as eleccións galegas baixo o lema Galiza en marcha e convoca para o vindeiro domingo en Santiago (Auditorio Abanca, 12h) o acto de proclamación de Ana Pontón tras a súa elección como candidata á Presidencia da Xunta. "Poñemos toda a maquinaria a funcionar para liderar o cambio real nas eleccións galegas", destacaron Olalla Rodil e Xavier Campos na presentación.
Fernando Vidal é elixido novo presidente do Deportivo da Coruña. O empresario chama a "poñer o contador a cero" polo "ben" da entidade. Vidal asinou a comezos do mes o acordo con Abanca para o rescate financeiro do club (Imaxe: RC Deportivo)
Julio Abalde toma posesión como reitor da Universidade da Coruña e inicia o seu segundo mandato á fronte da institución tras gañar cun 70% dos votos as eleccións celebradas o pasado decembro. (Imaxe: UDC)
Beatriz Mato fai oficial a súa baixa como deputada do PP no Parlamento. A ex-conselleira e ex-líder do PP na Coruña anunciou a súa retirada da vida política o pasado decembro. A substituta de Mato na Cámara galega será Ana Belén García, que fora concelleira en Noia no anterior mandato municipal.
O primeiro Consello do Goberno do PSOE e Unidas Podemos aproba a revalorización das pensións de xubilación conforme á suba dos prezos, un 0,9% con efecto retroactivo no mes de xaneiro. Pedro Sánchez informa este mediodía en rolda de prensa dos primeiros acordos do novo Executivo. Máis información, hoxe en Praza.gal
Dimite o alcalde de Cerceda tras ser inhabilitado oito anos por prevaricación. José García Liñares, do PSdeG, levaba 25 anos como rexedor da localidade.
O Goberno do PSOE e Unidas Podemos celebra o seu primeiro Consello de Ministros tras as tomas de posesión celebradas onte. Entre os asuntos sobre a mesa desta primeira xuntanza está a actualización das pensións atendendo ao IPC do ano pasado, decisión que Sánchez adiara ata o momento en que o Executivo deixase de estar en funcións.
VÍDEO | Chega 'Os 20 do XX', a nova serie de VINTE que, a través de vídeos animados, percorre a historia da sociedade galega de hai cen anos. É un traballo de Antón Varela con voz de Lucía Aldao. Xa podes ver aquí o primeiro vídeo
Os membros do goberno de coalición de PSOE e Unidas Podemos prometen os seus cargos ante o rei. Retransmisión ao vivo de RTVE