Costas tramitou en Pontevedra o pasado ano 4 casos de recuperación de terreos públicos no litoral, incluído o de Cárdenas, fronte os 7 de 2011 ou 4 de 2014 na mesma provincia e os 316 en todo o Estado no período 2011-15
O pasado ano a Dirección Xeral da Costa do Goberno de España tramitou só na provincia de Pontevedra 4 procesos de recuperación posesoria de terreos públicos do litoral ocupados dun ou doutro xeito por particulares. Un deles foi o proceso aínda non rematado e iniciado en novembro, avanzado en exclusiva por Praza.gal, para recuperar un terreo público duns 210 metros cadrados que está pechado conxuntamente coa propiedade privada que mercou en 2019 en Moaña Eva Cárdenas, parella de Alberto Núñez Feijóo.
Aquel proceso levou a Cárdenas a pedir unha concesión sobre ese espazo que agora lle vén de ser denegada, ante o que pode presentar recurso, o que alongaría a tramitación deste expediente de recuperación posesoria. Uns expedientes habituais con anteriores gobernos, que se van reducindo cos anos a medida que mellora a xestión da costa e que se enfrontan á falta de recursos persoais e materiais do departamento de Costas. Así o denunciou o Tribunal de Cuentas e asumiu o propio PP de Feijóo, que en decembro, un mes despois de coñecerse o caso de Cárdenas, pediu máis recursos para estas cuestións.
Segundo o Tribunal de Cuentas, as recuperacións posesorias de terreos públicos do litoral están reducíndose nos últimos anos. No período 2006-10 foron 1.412, no período 2011-15 foron 316 e no período 2016-2020 foron 90. Porén, o propio ente fiscalizador sinala importantes eivas na aplicación DUNA coa que Costas xestiona o seu traballo. Así, sinala que "as demarcacións e servizos provinciais dispoñen de listados de actuacións de recuperación posesoria á marxe de DUNA, polo que a información sobre estes procedementos é, en todo caso, incompleta". "Non existe un inventario único", engade Cuentas noutro punto do seu informe, polo que realmente hai máis expedientes de recuperación posesoria que os anteditos.
O Tribunal de Cuentas advertiu eivas na aplicación coa que Costas xestiona os expedientes de recuperación posesoria e apunta que realmente son máis que os rexistrados
No caso da provincia de Pontevedra, os rexistros de recuperacións transitorias do servizo provincial de Costas reflicten unhas oscilacións que poderían explicarse por eses problemas estruturais do departamento e pola progresiva redución de expedientes en todo o Estado a medida que se vai depurando a aplicación da Lei de Costas de 1988 que estableceu que parte do litoral debe ser pública. Segundo as súas cifras, en 2008 houbo 6 expedientes de recuperación posesoria, 1 en 2010, 7 en 2011, 4 en 2014, 2 en 2015 e 4 en 2024.
Terreo público marítimo-terrestre que dá acceso á praia desde a casa de Eva Cárdenas en Moaña
-
Terreo que forma parte do dominio público marítimo-terrestre malia estar pechado de xeito conxunto coa propiedade de Eva Cárdenas -
Terreo público marítimo-terrestre que dá acceso á praia desde a casa de Eva Cárdenas en Moaña -
Porta de acceso á praia desde o terreo que Costas quere recuperar e que foi renovada cos mesmos materiais que o resto de portas e fiestras da casa -
Imaxe do Catastro, á esquerda, coa liña azul que delimita o dominio público marítimo-terrestre, e á dereita delimitación da parcela pública de 210 metros cadrados situada entre a propiedade privada de Eva Cárdenas e a praia -
Terreo que Costas quere recuperar para uso público e que serve de acceso directo á praia do chalé de Eva Cárdenas en Moaña
Ante as dificultades para tramitar estas recuperacións posesorias denunciadas polo Tribunal de Cuentas, o pasado decembro a comisión mixta Congreso-Senado para as relacións con ese ente fiscalizador pediu ao Goberno máis recursos en xeral para os procedementos de defensa do dominio público por parte de Costas.
Nunha sesión presidida polo deputado galego Álvaro Pérez López, home da máxima confianza de Feijóo desde hai máis de dúas décadas, o PP asumiu o contido, conclusións e recomendacións do Tribunal de Cuentas e mesmo votou a favor dunha proposición do PSOE que insta ao Goberno "a corrixir as debilidades na protección e integridade do dominio público marítimo-terrestre, entre as que destaca a insuficiencia de recursos para exercer a vixilancia do dominio público marítimo-terrestre e para tramitar e executar eficazmente os procedementos administrativos en defensa deste".
