O Goberno galego presenta a industria militar como "unha extraordinaria oportunidade", publicita Galicia como "refuxio climático" para o turismo e propón ás empresas "aproveitar o nicho de mercado do envellecemento"
O pasado 12 de maio o Consello da Xunta aprobou a Estratexia galega do aeroespazo, seguridade e defensa coa que aposta pola industria militar para aproveitar as "crecentes oportunidades" do actual "contexto sociopolítico", isto é, das guerras, conflitos violentos e inseguridade. Pero non é a primeira vez que o Goberno galego ve en desastres sociais unha "oportunidade" de negocio para as empresas. No eido do turismo a Xunta está a publicitar Galicia como "Refuxio Climático" fronte aos efectos máis graves do quentamento global noutras zonas do planeta. E o avellentamento da poboación que é un problema para boa parte do país é proposto ás empresas como "nicho de mercado" a aproveitar.
No eido militar, a estratexia agora aprobada pola Xunta prevé destinar 183 millóns de euros a "incorporar Galicia ás crecentes oportunidades que ofrecen os sectores da defensa e a seguridade no marco do actual contexto sociopolítico". O propio presidente Rueda salienta que nos vindeiros anos "vanse incrementar as necesidades en materia de seguridade e defensa" polo que "o sector aeroespacial pode ser unha vía para que industrias xa consolidadas en Galicia, naval, automoción, loxística e metal, poidan diversificar a súa actividade". "Unha extraordinaria oportunidade para xerar nova actividade económica e tamén xerar emprego de calidade", engade a conselleira de Economía e Industria, María Jesús Lorenzana.
A Xunta salienta para atraer turismo coa marca "Refuxio Climático" que "nos últimos anos a temperatura media anual en Galicia incrementouse a un ritmo notablemente inferior"
Na mesma liña o pasado xaneiro, no marco da feira internacional de turismo Fitur, en Madrid, a Xunta presentou o cambio climático como unha oportunidade para o sector en Galicia. A conselleira de Medio Ambiente, Ángeles Vázquez, presentou Galicia como un lugar "privilexiado" e a súa meteoroloxía "benigna e amable" en comparación con outros territorios argumentando entre outras cuestións que "nos últimos anos a temperatura media anual en Galicia incrementouse a un ritmo notablemente inferior ao do resto do país".
Isto é, o quentamento global tamén afecta a Galicia, pero ao facelo de xeito máis lento supón unha oportunidade de negocio para o sector turístico. De aí a creación da marca Galicia Refuxio Climático. Porén, un recente estudo da UE cifrou en só un 0,5% o aumento do turismo en Galicia co actual quecemento global, que debera dispararse a niveis de moito maior risco para o medio mabiente mundial (4 graos) para que o país captase un 3% máis de turismo.
Previamente, durante a pandemia, a Xunta xa presentara Galicia como "destino seguro" fronte a outros pola menor incidencia da enfermidade ou a menor masificación, tentando así aproveitarse das recomendacións sanitarias fronte a COVID-19.
Tamén o avellentamento da poboación é para a Xunta un "nicho de mercado" que poden aproveitar as empresas. Así llo transmitiu directamente ao sector a finais de 2021, presentando o envellecemento activo como "un nicho de actividade" a aproveitar en Galicia e salientando "a importancia da industria do envellecemento activo como sector de actividade con gran potencial de crecemento".
O Plan Estratéxico de Galicia contempla "aproveitar o nicho de mercado que supón o envellecemento"
Despois, en 2022, o Goberno galego incluiría esa cuestión no seu Plan Estratéxico de Galicia 2022-2030, no que promove "aproveitar o nicho de mercado que supón na actualidade o envellecemento, de xeito que sexa unha oportunidade de emprego e de creación de novos retos".
Na liña de buscar "oportunidades para as empresas galegas", a Xunta tamén vén de crear un posto de conseguidor ou lobista en Madrid encargado de "configurar unha rede de contactos e oportunidades" que aproveite "o ecosistema económico empresarial da capital do Estado".
